怎樣下去?

今晚又係一個工作夜...o係公司做到12點左右時...突然覺得好辛苦...好唔舒服...去洗手間嘔咗一次...返位繼續寫份MC Script...因為趕住1點前send out...點知寫咗一陣...就覺得更加唔舒服...又死咗入洗手間...再嘔...今次真係感覺到唔係身體唔舒服喇...而係個心好唔舒服...因為我每次極唔開心...就會嘔...(而唔係喊...)

一路以嚟...每次個project幾大幾辛苦...時間幾趕幾唔夠...d客幾辣幾顛...我都無好似今次覺得咁辛苦...每次都同自己講...要捱就一定捱得過...過程中完全唔會覺得係咩事...當然結局總會有好有壞...但係今次...我真係跟得好辛苦...唔係...應該係做得個心好唔舒服...我問自己點解...係咪自己近來唔係做公事就做功課，做到傻咗...係咪自己要求太高，嘗試去做到一d或控制一d自己能力範圍以外的事...係咪好怕舊年同類活動犯過的錯，今年又再犯...係咪頂唔到呢d大公司內standard人的現實/殘忍做事手法...定係我對這份工的熱誠無咗...

的確，公事功事都好忙...那又如何﹖
的確，o係公司已經2年有幾...PA到依家...我對自己的要求確實在不斷提升...老細對我、同伴對我、客人對我亦會如此...
的確，我唔容許舊年犯過的錯今年再犯...正常不過...
的確，我不能亦不會恭維某些人的處事守則...現實本應如此...
最後，我找不到答案...

感覺就如自己是電視橋段內那些因為壓力大到死，躲在洗手間哭個死去活來，轉個頭又回到工作罔位上拼命的人...哎...好唔得...

出到去...原本真係好返d...點知cliff一句：「你無嘢呀嘛﹖唔好喊呀﹗」...我就即刻忍唔住喊咗出嚟...cliff同我一樣...唔明...點解呢個project會令到我o地咁樣﹖我EQ一向都唔係咁低...哎...同伴好驚...都話從來無見過我咁樣...我都係第一次見自己咁樣...

返到嚟...洗澡後...想去睡...但頭還是緊緊的...
我係咪做唔到落去喇﹖

itec聖誕狂歡夜

好開心今年聖誕正日居然可以約得咁齊嘅itec同學仔見面呢...計埋我...足足有成10位呀...
ken, iris, 阿嚴, 肥雄, gil, 阿孔, alice, 阿威 & kitty...

原本我o地好hea咁約打邊爐...點知「喜愛享受人生及對生活好有要求」嘅阿威居然主動要求食西餐應吓節...嘩嘩...真係世界變喇...人真係會進步o家...哈哈...我唯有順應佢嘅要求...即刻改搵一間餐廳食飯...o係咁嘅時節我都搵到間西餐廳訂到10個位...算係咁啦各位...哈哈...

最好笑係去到居然撞到iris嘅堂細佬... 佢好好人地請咗我o地10個1人1杯嘢飲...「橙雜定檸雜﹖」...哈哈...好笑...
而女仔們都好乖地根據dress code出現...而男仔喎...當然無啦...好鬼cheap呢...不過唔緊要啦...有我送俾大家嘅醜樣發光星星...大家都即刻變得好sharp啦...而女仔加埋隻靚靚發光玫瑰表...真係perfect呀...
好勁地大家都好乖咁帶齊聖誕禮物嚟交換呀...最喜出望外可算係肥雄嘅KENZO香水同gil嘅LANEIGE面膜囉...仲要俾我抽到gil嗰份喎...勁開心喎...哈哈...gil...我係咁膚淺o家咋...不過阿孔同alice嘅真係好hea...
最白痴係我o地最尾o係度狂玩紙炮同爆紙碎袋...阿嚴好蠢地學極都唔識玩呀...哈哈...大家都成身都係7彩紙碎...勁節日feel...

之後轉場去咗間cafe...不幸地阿豪臨時嚟唔到...你錯過咗咁精彩嘅一晚啦...仲有唔知算唔算係俾人呃嚟嘅louis...玩咗好多白痴game...UNO啦...層層疊啦...扭扭樂啦...5級「豬/珠??」啦...仲要俾人罰唱聖誕歌呢...

最終玩到3點就盡慶而回了...(不過都有人唔盡...哈哈...)
p.s.希望收到聖誕禮物嘅你o地都喜歡我嘅小小心意啦...

我在平安夜的第一次

原本今年想同爹娘出街食聖誕大餐嘅...但因為佢o地一聽到出去食係要成$500一位...即刻耍手兼擰頭...我唯有改變策略...改為...登登登登...親自下廚煮聖誕大餐俾佢o地食...

o係Kubrick表演完之後同朋友仔閒逛+研究咗一輪之後...都係決定向city super進發...被封路影響...攪到7點先去到...8點離開...9點爹娘有得食...算係咁啦...真係好鬼趕...因為驚餓親爹娘呀...佢o地平時好早食飯o家...係我同朋友仔嘅努力之下...都叫幾豐富啦...
法式煎鴨胸
德國肉腸併意大利雲吞
和風Pizza
傳統美式木頭蛋糕mini版
朋友仔好有心選嘅靚紅酒

見到佢o地咁鬼滿足嘅樣...覺得在這夜推掉那些Party局完全係正確的選擇...
其實o係節日多o的「溫」爹娘絕對係最好嘅...因為我平日真係太少時間陪到佢o地喇...

因為爹娘唔飲得多同食得多...所以我同朋友仔就慢慢一路吹水一路飲一路食...嘩...有線居然播「My Best Friend's Wedding」...即刻忍唔住睇多次...o係酒精駒使下...好快就好鬼眼瞓...極速送走朋友仔後就上床lu...
~~~~~~~~~~~~~~~~~~~~~~~~~~~~~~~~~~~~~~~~~~~~~~~~
24號晚上的夢裡見到的還是他...
有o的人總係你唔能夠忘記嘅...我會記得Honey嘅教誨：「勇敢地面對它」

我在平安日的第一次

經過琴晚嘅激玩之後...今日真係好驚自己會遲到一個好重要嘅約會...好彩...去到我仲有時間hea吓...

呢個平安日嘅第一次就係我嘅第一次公開表演唱歌喇...話說之前同個玩開band嘅朋友仔飯局時佢提起隊band平安日有演出但爭個女仔唱歌...跟住佢就邀請咗我入隊喇...而我亦都一口答應咗lu...o係極短時間下我以超速為呢個演出學咗十幾首歌...仲要o係我呢期極忙下練習...哈哈...不過無計啦...我真係太鍾意唱歌喇...好記得第一次上去見佢o的band友時真係有o的緊張...驚唱得唔好失禮朋友仔呀嘛...哈哈...

不過我真係好開心可以o係平安日下午o係油麻地百老匯電影中心隔離嘅Kubrick表演...因為本身我都好鍾意呢間書店+cafe...每次去睇戲都會入去逛逛o家...上一次仲o係度買范曉萱本書o家...公開唱歌係試過好多次...但係都係參加比賽嘅多...表演唱歌嘅都只係o係學校內試過...所以一開頭嘅真係唱得比較緊張...好彩經過MC講吓嘢之後...自自然然就好番好多lu...o係唱到我最鍾意o個首歌時...唯一知道我今次表演嘅朋友仔就出現咗lu...嘩...真係時間o岩o岩好呀...哈哈...「都唱得幾好呀」...

表演嘅感覺真係好過比賽好多...因為當relax返之後...係令人好enjoy嘅...好高興見到一o的現場觀眾...甚至係一o的o係門口行過去戲院睇戲嘅人都會停一停腳步、留一留神、聽一聽歌...或者自然地跟住唱一兩句...感覺自己真係帶到一o的歡樂同聖誕氣氛俾大家呢﹗

今次我會俾自己50分...下次可以有更多更大嘅進步呢...如果仲有下一次嘅話...哈哈...

聖誕派對

琴晚享受咗本年度唯一一個嘅聖誕派對...就係同一眾Solutions Babies...

有好美味嘅海鮮BBQ...食到燒完一輪...玩完都仲要煮熟埋再俾你o地食...嘩...海鮮喎...其他唔食都要食唒o的海鮮啦...哈哈...俾人串咗句：「估唔到你會煮嘢食」
有好難飲嘅紅酒...但係比雪飲咗好多...我o地已經不斷強調我o地係唔會送你返屋企o家...
有好好玩嘅遊戲...大家都有好白痴嘅隊名...今年無咗nana...我同烈女轉同空姐組成「女子組」...當然...勝利繼續係屬於我o地呢o的勁人啦...以表達能力等於0嘅cliff為首嘅「888食硬你」理所當然係包尾...哈哈...仲要係0分...弱者o係呢個世界真係有好多...包括一早都估到佢o地好雞嘅「崔蕭盈」...好彩都有隊旗鼓相當嘅「tem-pro」同我o地玩吓...
有好得意嘅交換禮物...繼上年玩「主題交換禮物」之後...今年都唔例外...上年換figure...今年換餐具...哈哈...呢班人真係好騎呢...點解佢o地對餐具嘅定義都可以理解成咁嘅呢...好奇異...終於我都換到自己好鍾意嘅XO...對唔住蔡小妹...我唔係唔鍾意你嘅選擇...只係我太鍾意古惑嘅XO喇...自從中一已經開始好鍾意...好開心呀...
有好吸引嘅抽獎...哈哈...多得小mic嘅努力...大家先有咁多禮物抽咋...原本我係抽到一個好靚嘅「大口仔香薰座」嘅...不過同高兒取得共識後...大家都各取所需...哈哈...我有兩個好靚嘅姣浪四嘅公仔呀...係著住睡衣好眼瞓咁o家...哈哈...好似我咁sexy呢...最後仲要俾我同烈女以實力得到咗壓軸現金大獎呀...嘩...佢攞到1000...我攞到2000呀...嘩嘩嘩...不過我o地都係會暗地裡攞番出嚟平分嘅...皆大歡喜呀嘛...哈哈...
仲知道咗好多秘密...哈哈...有人不甘寂寞...有人密實XX假正經...有人「好勁」...

遺憾係nana嘅缺席...我已經燒咗你份聖誕禮物喇...不過...我都會留番o的灰燼俾你留念...
**特別鳴謝吹蕭燕嘅精緻小糖果...小mic嘅愛的聖誕咭同神秘禮物...

塵埃落定

今年聖誕嘅活動大致上都拍版喇...基於本人今年公事+學事都好忙，我都最終推咗一O的應該推嘅同一O的唔想推嘅約會。對唔住呀，我忙完再同大家玩啦﹗

今晚都係夜媽媽去完好景睇隊LIVE BAND demo之後，先抽咗大概1個鐘去掃聖誕禮物，好彩，買嘢從來都係我嘅強項，YEAH，7788。聖誕，一個咁溫暖嘅日子係應該同身邊最愛分享嘅，所以幾忙都唔會唔記得你o地同...為你o地準備一份窩心嘅禮物呢﹗
Merry Christmas.

You will fade away

經過兩個星期嘅頹廢之後，我終於捨得振作喇。
因為廢人真係唔易做，喊夠、麻撚煩夠、short夠就算喇。Keep住係咁，真係會好累。
琴晚又傻咗一晚，攪到又無做到FYP，好彩今晚...嚟到早上5點我終於完成呢幾日嘅目標。

如果有人有嘢再敢打擊我，我一定還拖。我唔怕你o地o家，鬥長命呀笨。

權宜之計

o係交FYP中期報告的死線之前，仲會有多2個event阻礙我去衝衝衝，所以專登請咗兩日假去做。長時間對住部腦寫code，真係好似回到學生年代咁。當中仲有一班要溫習嘅itec人，一齊吹吓水、食吓tea，仲有久遠了嘅lunch k，好快活嘅日子。

不過，其實我真係好努力o家喇﹗我已經唔敢約人去街喇，當然被約到時就少不免要出吓啦﹗進度都叫幾好，對於我嚟講﹗

哈哈哈哈，日日唱住「時日像無多」提醒自己...

逛書店

偷到短暫的空閒，滿心歡喜地往一間上樓書店出發。

心中早已有一堆目標，到埗後第一時間逐一找尋出來，以便逐一攻陷。怎料，呆一呆，半小時過去了，卻是還未有任何斬獲。類1，不是目標書籍不好看，卻讓我看得不舒服。當中有林奕華的「等待香港」系列，只一個短篇，已感到他落筆的準。可是，那份白，甚或透，卻連繫著投射感，引起難受就無謂了。再來有驚心動魄的翻譯書籍「19秒」，好書，但連喘一口氣的機會都沒有的話，唔，受不來就是受不來。連我一向捧場的作家的新書也令我感到不是味兒的時候，心知道是時候放棄了吧﹗竟然讓我發現了最愛的內地雜誌「Vision青年視覺」，內心不免有點滾動，但想想今天的手氣那麼不順，還是速速放下這最新一期天書，以免火勢蔓延，唯有留待下回跟你再續前緣吧﹗

今天的我是軟弱的，只懂去相信自己想相信的，一點都不開放。但欣然接受，只因那並不是懦弱...還有那自在感。

心痛

發現咗除咗尾龍骨有撞親外，原來下巴位都整親...雖然我本身係一個玻璃人，但係經過咁多跌跌碰碰，再望望自己滿身滿腳嘅瘀傷，真係不禁替自己心痛了一下。

泰拳 Lesson 13

學習重點：
熱身
1,2+換腳
stand
2分鐘 扯拳
30秒 左前撐
30秒 右後撐
30秒 左右勾拳
30秒 1,2+右側踢
30秒 1,2+換腳+左側踢
自由練習：1,2+側踢+撐+勾+組合 -> 但因為雙腳瘀傷嚴重，所以我都係主打練拳...
學新嘢：傳說中真正嘅side kick呀...試咗幾下都唔中，好似好難咁...仲有會好暈...

老師評語：唔好再起踭(哎呀，唔駛打呀嘛﹗)...撐腳要高低分明呀﹗kick時要望實目標呀﹗

如果 愛

期待已久的一套電影...上映第一天的晚上便走去看了...
最欣賞的還是周迅...

~~~~~~~~~~~~~~~~~~~~~~~~~~~~~~~~~~~~~~~~~~

現在有多近　回憶有多遠
回憶有多重　現在有多倦
現在沒有愛　回憶往哪裡伸延

失手

哎呀，大鑊喇...前所未有咁大鑊...
講返出嚟，自己都覺得過份同好笑呀...

恐嚇電郵

無想過會晨早就收到這樣的一個電郵...閱後...個心真係不寒而憟...

「卑微無聲地」... 妖﹗

甜在心饅頭 - 阿芝版

今日勁勁勁意外地收到一條親手織嘅頸巾，隻色仲要好鬼襯我添，真係暖在心頭呀﹗最型係見我唔到都送到俾我，唔怪得琴晚MSN時古古惑惑啦，哈哈﹗

好記得舊年都同人講過想收到親手織嘅頸巾呢......

好慶幸有咁錫我嘅人，多謝哂。
我會o係今年冬天努力寵幸佢o家喇...

泰拳 Lesson 12

學習重點：
熱身
除o左1,2之外，仲要做埋換腳，嘩，點做2分鐘呀﹖唔好跳咁高都係唔last到囉...
靶1
1,2+1,2,3,4 -> 老師，我都知我疏於練習...鬼叫兩個禮拜無得上堂咩...
左踏步+右直拳 -> 新嘢...唔知點搶o個一步...
stand
2分鐘 扯拳
練組合：左勾拳+右直拳
15秒 右側踢 x 4 sets -> 唔夠氣
30秒 左側踢 x 2 sets -> 勁唔夠氣
再練組合：1,2+右側踢
靶2
3sets動作：1+右側踢、1+2+右側踢、左前撐
1+2+換腳+左側踢

老師評語：右直拳時唔好再起踭...右側踢好，左側踢要轉多o的腰...組合：1,2+右側踢夠快，不過唔駛踢咁高，因為屬於追擊，目標係踢腳...靶2完全收貨，難得左右腳都夠力，YEAH!

整頓中

放假一天後，回到公司第一件事是check email。
收到兩封讚賞上個星期六Annual Dinner的Email，好鬼感動，因為今個Dinner可算係我最滿意嘅一個，不枉上星期嘅4-6-2-4-1，一句「跟得好」真係好實在。雖然意外地做咗件好PR嘅事，不過...算啦...
嚟緊仲有兩個返單嘅Ann Din，要繼續努力。

下午終於放下心頭大石，好彩你無再嬲咋﹗Thank you.

混沌的心情慢慢清澈起來，要快啲復活喇﹗

明知故問

琴晚同故人傾咗個電話，講哂好想講嘅嘢，答案都係2擇1。
1個唔忍心去選
1個無決心去選
故人肯定地告訴我沒有第3條路，我亦不想再讓自己有第3、4、5條路。

多謝故人帶來的那份安然，在這夜，我慢慢地睡了。

Event人

嘩...好開心呀...經過咗
Mon - 4am
Tue - 6am
今晚居然可以2am就返到屋企...實在太令人振奮喇...哈哈...

回家途中打電話俾明天Event的比雪...果然佢仲o係公司戰鬥中...同是天涯EVENT人...今次係佢嘅第1個event...原本真係好想去撐場o家...但無辦法啦...我星期六event...聽晚要briefing...真係走唔開...希望佢成功啦...加油...你一定得o家...

P.S.期待我本年度的第1個annual dinner：「帶你進入童話王國」