郭富城 vs 劉愷威

上星期行經佐敦嘅時候...見到張劉愷威幫某男士健身美容中心賣廣告嘅巨型海報...對佢嗰個自己扯高件衫露腹肌但差啲先露點嘅pose都幾有印象...事隔幾日...我見到一張由郭富城代言嘅另一間健美中心廣告...海報中城城嘅pose居然一模一樣???
邊個抄邊個我就唔知...我剩係知兩人除咗一樣靠著緊身衫+擺一樣pose嘅show肌肉之外...不同嘅係我無見到有人註足觀賞城城張海報...但喺馬路邊就有成群人望住威威張海報發呆...男朋友仔忍唔住話：「真係無人知可以過馬過o家喎...剩係望住劉愷威。」然後佢拉住我過馬路...啲人先識跟住行囉...(包括我)...

排朱古力真係好靚咁呢!!!

香水

我不是一個經常噴香水的人...
我精神不振時便想到香水...噴一噴...好像醒神了一點...
我只有4支香水...全都是別人送的...但出奇地...那些氣味...我全都喜歡...
我喜歡收香水...送香水...但不會買香水...
我相信香水是緣份...她的氣她的味她的形象...是否合乎一個人的心意...很純粹感覺...收香水...送香水...都變得很有趣...
我只喜歡收密人送來的香水...而我亦只會送密人香水...不熟的...不配...

我曾經有一支很想買的香水...YSL的In Love Again...第一版...是唯一令我有衝動的...那時沒有In Love...我告訴自己In Love Again時就要買下她...到我要實踐承諾時...她卻推出了第二版...再也找不到第一版...在外地時也嘗試過找...專櫃姊姊告訴我全線都只賣第二版了...我卻很記掛那甜蜜的感覺...

我每次噴香水時...都好像噴多了一點點...總想找個人到我身上嗅一嗅...好像這樣就能把那一點點索走...一切才會變得恰到好處...
我總是這麼想...哈哈...

今天的我...很自我...

可愛女人

今日一早起咗身陪阿娘飲茶...大哥...大嫂...二佬都係...好齊腳呢...以致阿娘情緒極之高漲...見到大嫂嚟到...仲攞住佢最拿手整嘅蛋糕(真係幾好食o家)...就笑到見牙唔見眼咁話：「唔駛咁客氣啦...多謝哂喎...」
............
點知...我阿嫂回應一句：「我整俾我婆婆食o家!」...嘩...哈哈...真係笑爆我同二佬...唔知我平時唔知醜嘅性格係咪遺傳自阿娘嘅呢??哈哈...

跟住無啦啦...阿娘就燒埋我度...話阿爹琴晚見到我講電話講到眼紅紅...係咪唔開心喎??攪到阿爹嗰樣即刻勁尷尬...點知阿娘仲繼續喎...話最好你就係俾人炒魷魚...最憎你份工...定係同條仔掟煲呀??哎...真係吹漲...阿娘就係一個咁白嘅人...好型...
......
尷尬嘅阿爹亦終於出聲：「係都係佢走寶啫!」...天真嘅阿娘即刻和應：「梗係啦!」...哈哈...很窩心呢!

之後陪阿娘去做女人最鍾意做嘅嘢 - 行街...阿娘持住今日係媽媽節...扭計話自己無呢樣無嗰樣...又話自己唔係無錢買...係無人陪佢揀咋...呢啲浮誇嘅性格...真係同我一樣...拉咗佢入Shiseido慢慢玩...玩咗一輪...佢不知幾開心...女人都係貪靚嘅...點知佢知道價錢後...即刻話唔要...屈臣萬寧嗰啲平好多...算啦阿娘...有阿女埋單呀嘛...Sales姐姐好醒咁話你個女真係對你好啦...阿娘又笑到見牙唔見眼：「咁做女嘅錫阿媽係應份o家嘛...」夠啦阿娘...呢啲作為阿娘有仔女錫嘅虛榮心...係要滿足吓嘅...

夜啲再一家人熱熱鬧鬧地食個飯...加上阿娘懶醒地「教」我哋飲紅酒嘅精彩一幕...哈哈...好開心...


我與我的可愛女人

積極地病

睇醫生
飲水
食藥
瞓
呆滯

我做足哂病要做嘅嘢o家...
~~~~~~~~~~~~~~~~~~~~~~~~~~~~~~~~~~~~~~~~~~~~~~~

好似話出一身汗會快啲好返o家喎...

所以我...
喺房邊唱k邊扭呼拉圈谷汗...

仲執埋房添...我真係好似阿婆...咩都儲埋...執執吓仲執埋舊情信...exex親自錄製嘅MD...嘩...
~~~~~~~~~~~~~~~~~~~~~~~~~~~~~~~~~~~~~~~~~~~~~~~

若嫌身驅這麼重拍翼難高飛　來讓我承受你　能學到心不會死

病

多謝同事嘅病菌...可以讓我狠狠地病一場...

什麼也不用想...

藝高人膽大

今日起來還是一種想躲懶嘅感覺...

不過都係返咗學校讀書...一路讀...一路好眼瞓...不過都叫有啲嘢做咗...所以差唔多時候就同高小姐去食個飯啦...食飯前...我哋兩個都要去「公用」locker放低啲嘢...就喺呢個時候...有趣嘅事情就發生啦...

由於高小姐左手抱著一小堆notes...於是乎佢就嘗試用佢嘅右手將兩本書放入locker...點知兩本書實在太厚啦...佢隻手根本hold唔住佢哋...就喺兩本書就嚟跌嘅時候...佢居然...用佢塊面去擋住...哈哈...個場面實在太好笑...你都知佢塊面幾似小薪o家啦...即刻諗起中6時同佢影過嘅一張貼紙相...

我忍唔住問咗句：點解我有啲咁奇怪嘅朋友o家????哈哈...佢自己都認同佢真係咁多年都無變過...

跟住去咗hall附近食嘢...講咗好多大家都好有共鳴嘅嘢...哈哈...共勉之...

~~~~~~~~~~~~~~~~~~~~~~~~~~~~~~~~~~~~~~~~~~~~~

食完飯見時間尚早...我就自己走咗去遊蕩...一路由紅磡蕩咗去尖咀HMV...再蕩到對腳識痛先知停...嘩...3個鐘???
哎...遊蕩太好啦...

大笨象

你是一隻大笨象
沉重但可愛
愛是一隻大笨象
沉重但可愛

你是一隻大笨象
誰也無可替代
而對著一隻大笨象
無奈，卻沒法不愛
沉重但可愛

~~~~~~~~~~~~~~~~~~~~~~~~~~~~~~~~~~~~~~~~~~~~~~

沉重咗幾日啦...

好多謝同我睇drama嘅朋友仔...3日內送2次禮物俾我...知我唔開心都唔駛咁傻o家...

~~~~~~~~~~~~~~~~~~~~~~~~~~~~~~~~~~~~~~~~~~~~~~

內心一隅都在今天出現了...多謝哂...